Ho an’ny Fikambanan’ny Zanadranavalona Anosimanjaka, tsy mifanaraka amin’ny fanisan’andro nodimbiasana tamin’ny Abib ny famaritana fa ny 09 sy 10 Martsa ny fankalazana ny taom-baovao Malagasy. “Ny 04 jolay amin’ny 02 ora sy sasany no izy”, hoy Arima RABESATA, mpahay teti-andro sady nanoratra ny boky Alimanaka. Nohamafisin’ny Filohan’ny Fikambanana, Alain RAVELONARIVO, fa mamitaka ny Malagasy noho izany ireo fikambanana milaza fa ny 09 sy 10 Martsa no atao hoe: “Alahamady”.
Mifototra ara-tantara ny famaritana ny taom-baovao Malagasy. “Tsy afa-miala amin’ny vanim-potoanan’ny Ramadany ny fankalazana io fety Malagasy io satria mitovy amin’ny fanisan’andron’ny silamo ny kalandary Malagasy”, araka ny fanazavany. Manaporofo fa manodidina ny voalohan-dohan’ny volana jolay io fety io ihany koa ny soratra amin’ny vato eny amin’ny Lapan’ny Manjakamiadana , Andafiavaratra…sy ireo taratasy nifanaovan’ny Malagasy tany ivelany taloha satria misoratra eo akaikin’ny daty gregoriana, ny daty Malagasy.
Noho izany, mitsipaka ny fankalazana ny taom-baovao Malagasy amin’ity volana ity ny Fikambanan’ny Zanadranavalona Anosimanjaka. “ Manitsaka ny hasin’ny tany izany sady manimba ny soatoavina Malagasy”.
Efa niezaka nandresy lahatra ireo fikambanana hafa ity farany fa tsy nisy vokany izany.
Lynda A.